كل من ذاق العلاقه المؤذيه عارف ازاى بتستهلكنا بالكامل فى الوجود والغياب ، كلنا عارفين ازاى بتتعطل مواهبنا ، بنختزل كل طموحتنا وآمالنا فى العلاقه دى بس ..
بنفكر داخل العلاقه اننا خلاص اكتفينا بيها، وأنها اغنتنا عن غيرها ، بس فى الحقيقه هي استنفذت طاقتنا بأسرها ، فمبقاش عندنا من الطاقه النفسيه والعاطفيه ال يكفينا عشان نعمل اى حاجه غيرها ..
عشان كدا بنخرج من العلاقات دى ممتلئين بالجراح التى لا تزال تنزف ، فبنحتاج للعنايه والتعافي .
طيب اتعافى ازاى ؟
١- تقبل ايوا تقبل وصدق انك كنت ضحيه من ضحايا النرجسي تقبل انك اتأذيت ، تخلى عن فكره الإنكار متحاولش تصنع واقع موازى خيالي أخف وجع من الواقع المؤلم ال بتعيشه
متلومش غيرك ومتنسبش المسؤليه لطرف خارجى
زى مثلا متقولش ان الظروف كانت اقوى منا او دا كان حسد أو أن طرف تالت تدخل ف العلاقه ف دمرها ، وهنا بيودينا لحاجه لازم نفرق بينها وهي ان ممكن فعلا يكون فى أسباب بس دى بتبقى مؤاثرات لا متحكمات .. هي بتأثر فعلا بس مش بتجبرنا على الخوض ولا الاستسلام .
٢- تخلي عن وهم التغيير
متحاولش تغير النرجسي وتأمل ف انصلاح حاله ، دا اصلا وهم مزيف ، الشخص الوحيد ال ممكن تغيره هو أنت !
تخلى عن فكره الانتقام
لو رجع هيتلاعب بيك زى كل مره وهتسامحه ولو مرجعش ف خلاص تأكد انه لقى فريسه تانيه تشبعله رغباته ف ببساطه مش هتعرف تنتقم والانتقام الحقيقي من نرجسي هو التجاوز .
٣- التسليم
وفى المرحله دى لازم تعترف بعجزك عن المقاومه والتعلق المفرط بالمؤذي دا ، وأن اعتمادك على إرداتك لوحدها ، دا هيخليك تصدق المبررات ال ممكن تخليك عرضه للايذاء مره تانيه
وف نفس الوقت لازم تعترف انك مينفعش تستمر ف تعلقك وخضوعك ، ف لازم تختار قوه عظمى تستند ليها وتقوى بيها وطبعا زي ما كلنا عارفين أن القوى دى هي ( الله سبحانه وتعالى )
ف التأمل والدعاء والاستمداد الناضج .
وممكن بطرق تانيه زى مثلا انك تقرأ كتب تعافي تفهمك اى ال حصل ولى حصل وتشرحلك طرق الايذاء وحبائل السيكوباتى .
٤- روايه القصه
ايوا زى ما بقولك كدا لازم تروى قصتك
ف الوقت دا بيكون عندنا مشكله ف الثقه بعد العلاقه المؤذيه ، بس لازم نجازف مع شخص يكون متزن ، ناضج ، مستقر ، بيتمكن من اداره انفعالاته ويساعدك ف اداره الانفعالات ال ممكن تحصلك أثناء روايتك للقصه .
مش عيب انك تعترف بمحدوديتك وتتصالح مع قصورك الانسانى مش عيب انك تطلب المساعده وتبحث عن الدعم ف صديق أو قريب أو متخصص كمعالج أو طبيب أو ممكن مجموعه دعم مر أعضاؤها بنفس التجربه
ف الوقت دا بنحتاج لل يوجهنا ويقولنا ان فى اخر النفق المظلم دا يقبع ضوء وسلام حتى لو مش شايفينو دالوقتى
٥- وفى النهايه لازم تتحمل مسؤوليتك عن التعافي
ممكن متكونش مسؤول بالكامل ع ال حصل بس انت كنت شريك
والاهم من دا كله انك مسؤول دالوقتى عن تعافيك وتجاوزك .
للكاتبه: أيه علام